Söfnunin hjartað slær í Vatnsmýri er búinn að slá Íslandsmet. Aldrei hafa jafn margir Íslendingar skrifað undir áskorun til stjórnvalda fyrr og er það mikið fagnaðrefni fyrir alla þá sem styðja það að flugvöllurinn verði áfram í Vatnsmýri, en frá þessu er sagt á mbl.is í dag.
„Þetta er stærsta áskorun á íslensk stjórnvöld frá upphafi og við erum gríðarlega ánægðir með það. Við vitum reyndar að við eigum mikið inni ennþá. Það er töluvert af undirskriftalistum úti og margir sem hafa samband við okkur á hverjum degi og vilja skrifa undir en eru kannski ekki með aðgang að tölvu og svo framvegis.“
Þetta segir Friðrik Pálsson, einn að aðstandendum undirskriftasöfnunar til stuðnings þess að Reykjavíkurflugvöllur verði áfram í Vatnsmýrinni á vefsíðunni Lending.is. Söfnunin hefur staðið yfir í frá því um miðjan þennan mánuð og stendur fjöldi undirskrifta nú í rúmlega 56 þúsundum. Er þetta mesti fjöldi undirskrifta sem safnast hefur í slíkri söfnun hér á landi.
Friðrik segir þó að undirskriftalistar séu ekki inni í þessari tölu og fyrir vikið er fjöldi undirskrifta væntanlega talsvert meiri. Þá eru aðstandendur söfnunarinnar hvergi nærri hættir en til stendur að afhenda undirskriftirnar 20. september næstkomandi þegar frestur til þess að skila inn athugasemdum við aðalskipulag Reykjavíkurborgar rennur út og því allmargir dagar enn til stefnu. „Þetta er þannig bara einn áfangi á þessari löngu leið.“
Stjórnvöld verði að endurskoða áform sín
„Við ákváðum að setja okkur ekki opinbert markmið en auðvitað var von okkar að við næðum að fara yfir það sem best hefði sést áður. Hins vegar voru viðbrögðin strax fyrstu klukkutímana og dægrin þannig að við sáum fljótlega að þetta myndi líklega nást og meira en það. Í mínum huga er þessi þátttaka orðin þannig að það fer ekkert á milli mála að stjórnvöld verða að taka til mjög alvarlegrar skoðunar þau áform sem uppi hafa verið um að leggja niður þennan flugvöll,“ segir hann.
Friðrik segir að séu allir þættir málsins skoðaðir sé það deginum ljósara að ekki sé hægt að leggja niður starfsemi Reykjavíkurflugvallar í Vatnsmýrinni. „Þetta er okkar aðalsamgöngumannvirki, þetta er okkar járnbrautarstöð og það dettur engum í hug að hrófla við slíkum mannvirkjum og samgöngutækjum neins staðar.“
Tengt efni:
Ef þú vilt skrifa undir þá er slóðinn hér Hjartað slær í Vatnsmýri
