Ólafur Adólfsson, apótekari í Apóteki Vesturlands, segir að lyfjabúðir séu hálfgerðir greiðslumatsfulltrúar fyrir Sjúkratryggingar Íslands eftir að nýtt greiðsludreifingarkerfi var tekið í notkun.
Nýtt lyfjakerfi tók gildi á laugardaginn var. Því er ætlað að jafna stöðu fólks með ólíka sjúkdóma með tilliti til lyfjakostnaðar. Með nýja fyrirkomulaginu greiðir fólk allan kostnað upp að vissu marki, en eftir það kemur ríkið inn í með niðurgreiðslur. Þeir sem ekki geta greitt fyrir lyfin geta sótt um greiðsludreifingu.
Ólafur segir að hún sé ekki komin í endanlegt horf. „Ég held að flest apótek hafi ákveðið að taka þátt í að annast þessa þjónustu fyrir sjúkratryggingar, reyndar sjúkratryggingum að kostanaðarlausu og sjúkratryggðum að kostnaðarlausu, en það á ýmislegt eftir að laga í því dæmi. Þetta verður gert meira og minna handvirkt til að byrja með,“ segir hann.
Apótekin sækja um greiðsludreifingu fyrir þá viðskiptavini, sem óska eftir því, til Sjúkratrygginga sem þarf að gefa samþykki sitt. Viðskiptavinurinn kemur aftur í lyfjabúðina þegar samþykki er fengið og þá á samningur að ligga fyrir sem þarf að undirrita og greiða upphafsgreiðslu. Búast má við því að þetta taki einhvern tíma og vinnu hjá lyfjabúðunum. Ólafur segir að þetta sé alveg nýtt hlutverk fyrir lyfjabúðirnar. „Erum við ekki að segja að við séum bara hálfgerðir greiðslumatsfulltrúar fyrir sjúkratryggingar?“
www.ruv.is 06.05.2013
