Fróðleiksmoli: Brjóstverkir

Brjóstverkur getur verið merki um að þú sért að fá hjartaáfall.

Brjóstverkir eru þess eðlis að þá ber að taka alvarlega og finna á skýringar. Líklegt má telja að einhver okkar hafi fengið einhver einkenni sem við höfum hundsað en hefðu hugsanlega verið einkenni sem ástæða hefði verið til að athuga nánar. Brjóstverkir eru alvörumál þó að þeir geti líka verið sárasaklausir, þeim ber að gefa gaum.

Samkvæmt rannsóknum þá virðist það vera staðreynd að áður en við fáum hjartaáfall þá fáum við viðvörunarmerki, hugsanlega brjóstverki sem við hundsum eða hristum af okkur. Það má því leiða að því líkum að ef brugðist hefði verið við í tíma hefði hugsanlega verið hægt að koma í veg fyrir frekari vandræði.

Eins undarlega eins og það kann að hljóma þá sýna rannsóknir einnig að konur leita seinna til læknis eða á sjúkrhús ef þær fá brjóstverki, eða þremur tímum seinna en karlar.

Brjóstverkir

Brjóstverkir (angina) eru aðvörunarljósin um að ekki sé allt með felldu. Þeir eru alvörumál og þá skal ætíð taka alvarlega. Það má vera að sumir þeirra brjóstverkja sem að fólk finnur fyrir eigi sér ofureinfaldar orsakir; stafi frá stoðkerfi, tengist gollurhúsi sem umlykur hjartað, sé millirifjagigt eða einfaldlega of mikið álag.

Viðkomandi gæti þó líka verið með kransæðasjúkdóm sem þarfnast meðhöndlunar eða verið að fá hjartaáfall. Brjóstverkir framkallast þegar hjartavöðvinn fær ekki nægjanlegt súrefni vegna lítils blóðflæðis um kransæðarnar.

Ef brjóstverkir tengjast kransæðastíflu/hjartaáfalli leiða þeir oft út í vinstri handlegg, jafnvel báða, upp í háls og tennur og jafnvel aftur í bak. Verkirnir koma oftar fram við áreynslu þegar hjartað vinnur hraðar og þarf á meira súrefni að halda.

Brjóstverkir við áreynslu þurfa ekki að þýða að viðkomandi sé að fá hjartaáfall heldur koma verkirnir þegar blóðflæði er ekki nægjanalegt í skamman tíma. Hjartaáfall verður þegar blóðflæði stöðvast algjörlega.

Brjóstverkir gefa samt sem áður til kynna að ekki sé allt með felldu og því þarf einstaklingur með verki sem þessa að hafa tafarlaust samband við bráðamóttöku eða hringja á sjúkrabíl í síma EINN EINN TVEIR.

Auglýsing

Munið eftir að læka við okkur á Facebook