Bæta líffæragjöfum tekjumissi og kostnað

RÍKISSTJÓRNIN samþykkti í gær tillögu Jóhönnu Sigurðardóttur félags- og tryggingamálaráðherra og Guðlaugar Þórs Þórðarsonar heilbrigðisráðherra um að ráðist verði í gerð frumvarps til að styrkja réttarstöðu lifandi líffæragjafa. Verður m.a. unnið að því að bæta líffæragjöfum tekjumissi og mæta kostnaði einstaklinga sem hlotist getur af líffæragjöf.

Vinnuhópur ráðherranna skilaði skýrslu sinni í apríl en hann kannaði stöðu lifandi líffæragjafa, einkum með tilliti til greiðslna vegna tímabundins vinnumissis eftir líffæragjöf.

Lagt er til að sett verði sérstök löggjöf um það hvernig greiðslum til líffæragjafa skuli háttað. Hafa megi til hliðsjónar þær reglur sem fram koma í lögum um greiðslur til foreldra langveikra eða alvarlega fatlaðra barna þannig að tekjutengdar greiðslur til líffæragjafa nemi 80% af meðaltali heildarlauna og að hámarki í 3 mánuði. Þá má hámarksfjárhæð tekjutengdra greiðslna í hverjum mánuði ekki nemi hærri fjárhæð en 518.600 kr.

omfr@mbl.is