Dulinn aðdragandi að hjartaáfalli og einkennin sem við hlustum ekki á

Dulinn aðdragandi að hjartaáfalli og einkennin sem við hlustum ekki á

shutterstock_219110776 (2)Líklegt má telja að á hverjum degi fái nokkuð margir Íslendingar einhverskonar einkenni sem stafa frá hjarta en viðkomandi lætur fram hjá sér fara eða ber ekki kennsl á. Boðskapurinn í pistlinum er mikilvægur en það eru oft þessir litlu hlutir sem við teljum ekki alvarlega sem geta skipt miklu máli í aðdraganda hjartaáfalls. Þegar allt er talið saman þá skipta þeir máli og geta haft afdrifaríkar afleiðingar.

Aðdragandinn að hjartaáfallinu mínu var fyrirvaralaus að því er mér fannst í fyrstu. þrátt fyrir að ég færi yfir síðustu mánuði í huganum dagana eftir áfallið gat ég hreinskilningslega sagt að ég hafi alls ekki átt von á þessu enda ekki nema 37 ára gamall á þeim tíma.

Ég ferðaðist mikið vegna vinnu minnar á þessum á þessum árum og álagið var oft mikið. Ég átti erfitt með svefn og undir það síðasta þá fann ég hvernig úthaldið minnkaði og þreytan jókst, mér fannst ég vera að brenna út.

Ég var oft með óreglulegan hjartslátt og aukalsög sem lýstu sér þannig að það var eins og hjartað sleppti úr slagi. Mér var þungt fyrir brjósti, var móður og leið illa. Þetta var mjög óþægilegt og ég hafði af þessu áhyggjur. Ég fór því til heimilislæknis sem tók blóðprufur.

Lækninn sagði mér að það væri í lagi með blóðprufurnar og taldi hann líklegt að millirifjagigt væri líklega að hrjá mig og álagið og streitan væri bara að segja til sín, gerði lítið úr þessu og skrifaði ristruflanirnar sem trufluðu mig á kvíða en sá ekki ástæðu til að kanna málið frekar eða senda mig áfram til frekari rannsókna.

Átta mánuðum eftir blóðprufuna hjá heimilislækninum fékk ég hjartaáfallið en stöðugt hafði dregið af mér þessa mánuði og engar höfðu fundist skýringarnar og hvergi hringt viðvörunarbjöllur.

Ég áttaði mig ekki á því hvað var að gerast þar sem ég þekkti ekki einkennin þrátt fyrir að á þessum tíma hafi legið fyrir:

  • Gríðarmikið álag í langan tíma og mikil streita
  • Úthaldsleysi
  • Mæði
  • Erfitt að ná upp þreki
  • Þyngsl fyrir brjósti
  • Tilfinning fyrir því að mig vantaði súrefni
  • Hjartsláttartruflanir undir álagi og eftir mikið álag
  • Ristruflanir
  • Of hátt kólesteról, 6,9 átta mánuðum fyrir hjartáfall en 7,6 þegar hjartaáfallið reið yfir

Þrátt fyrir að hafa verið einungis 37 ára gamall á þessum tíma hefðu þessi einkenni átt að duga til þess að heimilislæknirinn minn hefði átt að láta athuga hjartað í mér eða senda mig til sérfræðings.

Það var fyrir hreina tilviljun að mér varð ljóst að heimilislækninum hafði yfirsést að ég hafði kólesteról sem var 6,9 átta mánuðum fyrir hjartaáfall. Þessi vitneskja varð mér ljós nokkrum árum eftir að ég fékk hjartaáfallið.

Það má því færa rök fyrir því að hefði læknirinn borðið gæfu til þess að reka augun í þetta háa kólesteról, hefði hugsanlega verið hægt að gera eitthvað í málunum, senda mig til sérfræðings, laga æðaþrengslin og ég jafnvel aldrei fengið hjartaáfall.

Því miður þá varð það ekki raunin.

Mig langaði að deila þessu með ykkur því ég veit að það eru margir sem telja sig ekki finna fyrir neinu en þegar grannt er skoðað er eitt og annað sem bendir til þess að það sé kannski ráð að panta sér tíma hjá hjartasérfræðingi til að láta ganga úr skugga um að allt sé í rauninni með felldu.

Það er mikilvægt að þekkja gildin sín og þess vegna er það góður siður að fá afrit af niðurstöðum rannsókna sem gerðar eru og sætta sig ekki við að fá engin svör heldur halda áfram það til viðunandi niðurstaða fæst, góð eða slæm.

Verum góð hvort við annað og njótum þess að vera til því það er ekki sjálfsagt.

Björn Ófeigs.

Munið eftir að læka við okkur á Facebook