Hjartagátt opin allan sólahringinn

Landspítali
Landspítali

Frá síðustu mánaðarmótum hefur Hjartagáttin við Hringbraut verið opin allan sólarhringinn, sjö daga vikunnar. Að því tilefni viljum við vekja athygli á því að Hjartagátt er bráðmóttaka sem þjónar fólki þar sem grunur er um að einkenni stafi frá hjarta og eins og áður sagði er hún staðsett við Hringbraut.

Á Hjartagátt er tekið á móti öllum ef grunur er um bráð hjartavandamál. Til þeirra teljast meðal annars brjóstverkir, mæði af líklegum hjartatoga, hjartsláttartruflanir, yfirlið af líklegum hjartatoga og hjartastopp.

Sími 543 1000: Skiptiborð spítalans gefur samband við Hjartagátt í völdum tilfellum. Ekki er veitt almenn símaráðgjöf á Hjartagátt nema til þeirra sem hafa verið þar eða á hjartadeild nýlega (innan 4 vikna).

Ef ástand sjúklings er þannig að það krefst læknisskoðunar hið fyrsta þá er best að koma strax á Hjartagátt eða hringja í 112 og greina frá erindinu.

Hjartagátt sinnir fjölþættri þjónustu við hjartasjúklinga

Til starfsemi Hjartagáttar teljast meðal annars bráðaþjónusta við sjúklinga með einkenni frá hjarta, dagdeildarstarfsemi. innskriftarmiðstöð og göngudeildir hjartalækninga. Öll starfsemin fer fram í kjallara sjúkrahússins á einingum 10-D og 10-W.

Á dagdeildinni dvelja þeir sem eru innkallaðir af biðlistum í rannsóknir og inngrip eins og hjartaþræðingu, kransæðavíkkun, brennsluaðgerðir á aukaleiðsluböndum, gangráðsísetningar og rafvendingar. Starfsemi bráðaþjónustu og dagdeildar er samtvinnuð utan dagvinnutíma.

Auglýsing

Göngudeildarþjónustan er fjölbreytt og tekur einnig til þverfaglegrar starfsemi. Á göngudeildum hjartalækninga er lögð áhersla á að sinna sjúklingum með flókin hjartavandamál og fyrstu endurkomu þeirra sem nýlega hafa dvalið á sjúkrahúsinu.

Meginstarfsemi hjartalækninga, þar á meðal hjartaþræðingastofur, legudeildir og allar rannsóknardeildir hjartalækninga, eru við Hringbraut og því augljóst hagræði af því að hafa bráðaþjónustu hjartasjúklinga á sama stað.

Hjartagáttin (10D og 10W) er opin allan sólahringinn og er staðsett á jarðhæð Landspítala Hringbrautar. Gengið inn Eiríksgötumegin.

Sími 543 1000: Skiptiborð spítalans gefur samband við Hjartagátt.

Munið eftir að læka við okkur á Facebook